An repons a: Koplan nan stad la! Editor te ekri a,
Michel-Ange Hyppolite afiche mesaj sa, jou 09 Dawou 2000 a 21:31:27:
Sipozon editè a vle satiyèt lespri mounn ki ap vin sou fowòm lan ak lanng angle se dwa li. Mwen pa gen anyen mwen kab fè kont sa. Sepandan, pou mwen se youn danje pou nou bay lanng angle ladesant nan ti bout espas tou piti sa a ki rezève pou kreyòl la. Pou mwenmenm se pa youn bon lide. Si se sa editè paj la vle fè. Si li kwè ladan toutbon, mwen ta sigjere youn fraz nan lanng angle osnon youn pwovèb nan lanng angle. Li ta kab ekri li youn fason pou li tizonnen mounn pou yo reponn.
Nan ka pa mwen, lefèt mwen pa wè non ekip pa mwen an, ekip nèg bèlè parèy mwen yo, mwen vle di Egnwa (Aigle Noir ) se deja youn rezon pou mwen di: Atò sa ki te gen tan gen la a. Poukisa se non Resin ak Vyolèt sèlman ki parèt? Alatraka papa!!
Mwen konprann lide satiyèt editè a vle fè ak lanng angle a, men tanpri misye editè a, mwen ap mande ou de favè:
Younn pyèsmounn pa ta dwe reponn koze satiyèt la nan lanng angle.
Dezyèmman tanpri , tanpri tanpri, pawòl nan lanng angle ou vle mete a pa ta dwe depase youn fraz osnon de fraz.
Se sa ase mwen vle di. Mwen pa kache di ou li lide parèt ak angle nan ti bout espas sa a ou prete nou an deranje mwen anpil, paske mwen konnen depi ou bay lasal tout mounn ap mande pou yo pran chanm epi anvan lontan se angle sèlman ki pral sèvi pou yo pale sou kreyòl. Epi se va domaj pou mounn tankou mwen ki renmen lanng kreyòl la anpil anpil yo.
M'ale
ak lapenn nan kè mwen
Michel-Ange
- Koplan nan stad la! Editor 09/8/2000
- Koplan nan stad la! Jafrikayiti 09/8/2000
- Koplan nan stad la! Michel-Ange Hyppolite 10/8/2000
- Koplan nan stad la! Michel-Ange Hyppolite 10/8/2000