Petisyon 193 "Sitwayen" yo

[ Kesyon Moun Mande Anpil ]

An repons a: Petisyon 193 "Sitwayen" yo jafrikayiti te ekri a,

Guy S. Antoine afiche mesaj sa, jou 16 Dawou 2000 a 18:47:03:

Sa se yon bèl dokiman, mwen te wè li an Franse, mwen te wè li tou an Angle, men se premye fwa mwen wè li an Kreyòl. Men mwen genyen plizyè ti enkyetid sou li, asavwa:

1) Kote non 193 sitwayen sa yo. Mwen te gen tan wè dokiman sa douz fwa konsa, prensipalman an Franse. Men chak fwa, se non sèt ou uit nèg konpetan mwen wè ladann, pa plis. Men kote non 180+ lòt yo? Poukisa mwen pa kapab konnen kiyès ki siyen dokiman sa? Eske tout lòt moun yo siyen anonim (e lè sa, fòk nou ta va analize validite bagay sa), ou genyen yon mistè nan sa. Antouka, jiskaske mwen wè tout lis siyatè yo, mwen pa p vale boul "193" sa. Ede mwen tanpri.

2) Gen yon pwen ki merite devlope nan tèks sa, paske li twò enpòtan pou li rete nan jeneralite san yo pa voye okenn limyè sou li. Men li:

"Nou mete men nan tèt lè nou wè resous biwo Leta ap fè sèvis gouvènman, tan pou yo fè sèvis Leta;"

An franse, men kòman li te parèt:

"CONDAMNER l'assujettissement de tous les appareils de l'état au service de la mise en oeuvre des choix du Président de la République,"

Sa se yon gwo akizasyon, petèt li valab, men fòk li detaye.

3) Nan kad eleksyon senatoryal "konteste" yo ak eleksyon prezidansyèl ki prevni pou 26 Novanm nan, eske dokiman sa gen avan tou yon bi politik sitou?

Bon, mwen vle fè tout moun konprann mwen pako pran pozisyon pa rapò a dokiman sa. Mwen wè se yon dokiman ki parèt responsab anpil, epi li deklare anpil anpil verite. Mwen espere tout pwen sa yo, nou ta kapab diskite yo seryezman pwen pa pwen. Nou va dekouvri anpil nan malèz Ayiti ladann. Men fòk nou fè atansyon: fòk nou kapab wè aklè entansyon moun yo ki ap distribiye dokiman sa, pou nou pa tonbe anba men "Las Casas" osnon "Nicolas Ovando" ankò. Kreyòl pale, kreyòl konprann. Ban mwen yon ti limyè, souple.



Repons sou sijè sa: