Petisyon 193 "Sitwayen" yo

[ Kesyon Moun Mande Anpil ]


An repons a: Petisyon 193 "Sitwayen" yo jafrikayiti te ekri a,

Marc-Arthur Georges afiche mesaj sa, jou 17 Dawou 2000 a 07:50:42:

Tou dabò m’ap voye yon gwo salitasyon patriotik alaronnbadè bay tout moun kap goumen pou la vi ka vin myò. Gen lontan mwen pat vin sou sit la, koulyè a mwen retounen an bon e difòm.

Mwen kontan wè ke « Intélektyel" peyi nou toutakou dekouvri lisaj bouch yo. Tankou yo di: li pa janm trò ta pou byen fè.

Men an nou fè trè atansyon. Se nòmal pou sosyete sivil yon peyi pwononse li sou sa kap pase nan peyi li. Se wòl sosyete sivil la pou li fòme yon sòt de kontrepwa pou li ka rive kontwole leta, men se pou nou ouvri je nou byen gran, pou nou wè ki moun kap di ki bagay, e nan enterè ki moun yap di li. Nou pap fè jwèt woulibè. Dapre sa mwen li ke mesyedamm yo deklare, mwen ta gen detwa keksyon mwen ta pose "intèlektyel » sa yo.

Eske se koulyèa ke yo pran konsyans ke peyi an kriz?

Eske se leta aisyen sèlmann ki lakòz kriz peyi nou an ?

Pou ki sa moun sa yo pa fè yon rele dèyè oposisyon yo tou pou yo fè yon chita ak gouvènman pou nou ka rive twouve yon solisyon pou peyi a, tanpou yap mache fé pèlerinaj nan pye „Sen" Helms, pou yo mete anbago sou tèt peyi a?

Eske se koulyè a ke moun sa yo konnen ke peizan ap pran kanntè paske latè yo ta dwe kiltivé a deja pati, pran devan, nan lanmè akòz de erosyon?

Ke moun sa yo rele pèp kap pwoteste pou dwa yo "Chimè etc." se yon gwo arogans. Mezanmi moun yo fatige goumen, yo fatige pran lari; mwen konprann ke yo vinn agresiv. Si nou chita nan gwo chèz boure nou, pandan ke majorite Aisyen ap kripya nan lamizè, pa etone ke yon jou bagay sa vire kontre nou. Pwoblém la pa yon pwoblèm « chimè, kap kraze brize », tankou mesyemdamm yo di, pwoblèm nan se ba yo yon altènativ a kouri sou beton an. Ba yo manje, e nou gen pou nou wè, yo pap ni kraze ni brize, dayè sa yo pral fè nan lari a menn!

Mwen pa kwè gen yon moun ki pa dakò ak petisyon mesyedamm sa yo. Men lè nou gade byen sa yo ekri, nou wè se yon pakèt akisasyon ak yon pakèt bagay ke tout moun wè kap pase nan peyi a depi yon pakèt lane. Sa mwen map atann de sa yo rele "elit intèlektyel » se pa konstate malé yon peyi sèlman men se bay solisyon. Mesyedamm yo pa pwopose anyen, ANYEN MEMM. Mwen pa bezwen medsen poum di ke yon moun malad, men mwen dwe ale kay yon doktè si mwen vle geri malad la. Wòl yon Intlektyel, se pa sèlmann akise, lè sa twò cho pou yo, lè interè yo menase, men se sitou reflechi pou peyi li, gen yon rèv pou Ayiti.. Yo ta dwe yon bousòl pou peyi a. Sa pa etone mwen ke Ayiti nan la deriv. Intèlektyel sa yo pa gen okenn visyon pou Ayiti. Sa fè mwen sonje Pyés teat Frankétienne kote Piram ap akise Filidò (intèlektyel) ke se moun parèy li yo ki responsap malè ayiti. Mwen kwè ke li gen rezon.

Mwen si e sèten ke si nou pa fè atensyson, si nou pa jwenn yon kompwomi antre nou (mwen byen di antre nou, paske pèp la fè chwa li deja, 21 me ki sot pase la), nap rive nan yon sitiasyon kote anpil moun pwal pran desisyon ekstremis, kote pép la pap kwè nan politik ankò, kote yo pa pwal vote ankò.

An nou kontinye woule tanbou diskisyon an paske mwen rete kwè ke yon lòt Ayiti posib.

Marco




Repons sou sijè sa: