An repons a: valkanday ap batize Franz Benjamin te ekri a,
Michel-Ange Hyppolite afiche mesaj sa, jou 22 Dawou 2000 a 19:06:52:
Franz mwen resevwa Valkanday jodi a. Li gwosè youn sidi. mwen li-l ak anpil plezi. Valkanday daprè mwen se youn rèv ki kòmanse epi ki gen pou li kontinye deplwaye nan mitan tout mounn ki damou pou kalite pwezi mwen rele pwezi imajis la. Nan Valkanday gen de tèm: lanmou ak toumant sosyal. Sa vle di nou toujou rete nan nivo de tèm prensipal ki genyen nan pwezi kreyòl la.
Langay lanmou nou jwenn nan Valkanday la se youn langay byen pòtan ki benyen nan rèv. Youn langay ki dekore ak imaj kreyasyon. Se youn langay banda.
Sou bò tèm toumant sosyal la, pou noumenm, gen travay ki dwe fèt toujou. Pwezi se youn travay bèbèl ki nou dwe bay pouvwa pou li fè nou reve. Si langay lanmou ki nan Valkanday yo rive deniche flonn rèv nan lespri nou, nou pakab di menm pawòl la pou tèks ki gen karaktè sosyal yo.
Pwezi kreyòl la ap tann toujou . Wi pwezi kreyòl la ap tann rèv mèvèy sou youn frany filozofik.
Mwenmenm ki ap pale ak nou la a mwen poko rive la. Men se defi mwen bay pwòp tèt mwen. Mwen espere anvan lontan nou va jwenn anpil lòt zanmi kreyatè ki vin kole tèt ak nou pou nou fè mèvèy filozofik donnen nan jaden kreyòl nou an. Nou dwe vanse. Nou pakab rete nan menm wotè a pou vitametènam.
Nou dwe kite lespri nou valkande toupatou nan zantray lavi pou nou kab rive keyi tout kalite rèv pote bay letkyè nou yo.
M'ale
Michel-Ange
( Kaptenn Koukourouj )