An repons a: Match amikal Haiti-Honduras Nekita te ekri a,
jafrikayiti afiche mesaj sa, jou 25 Dawou 2000 a 22:41:52:
Onè,Anpil respè pou ou Nekita d
Gen kèk tan m ap suiv rapòtay nan laprès osijè ekip la. Mwen wè mesye yo evolye Ayiti tou. Ojis, obsèvasyon ou fè konsènan fizik mesye yo valab pou omwens 80% nan jwè yo. Gen tout kalite vye ekskiz pachiman ki ka itilize pou jistifye sitirasyon sa a, men pa gen okenn ladan yo ki akseptab. Cameroun pa yon peyi rich. Tankou Roger Mila te di sa a alokazyon tounwa "Retounen nan Stad la" nan ane 1998, Cameroun te envesti nan ekip foutbòl li a, se sa ki te bay rezilta nou te wè nan ane 1990 la.
Men, se pa move nouvèl sèlman ki genyen osijè foutbòl Ayiti. Bò kote pi jèn yo sanble Evans Lescouflair ak ekip Sekretarya Jenès ak Espò a ap fè anpil pwogrè nan yon pwogram pepinyè yo mete sou pye depi kèk ane. Detanzantan mwen li kèk bon rapò sou sa nan Agence Haitienne de Presse. Kidonk, lespwa foutbòl la, menmjan ak anpil lòt bagay Ayiti, se pa nan jenerasyon sa a li ye...Se nan ti moun yo pou nou kontinye envesti anpil resous pou solèy la ka sispann boule tèt nou san li pa klere je nou.
Lè fanm tankou Nekita kontinye pote limyè nan tout domèn, sou tout fowòm... sa vle di tou fanmi an ap pwofite ni bò kote maskilen, ni bò kote feminen li.
respè,Jafrikayiti