Petisyon 193 "Sitwayen" yo

[ Kesyon Moun Mande Anpil ]

An repons a: Petisyon 193 "Sitwayen" yo Marc-Arthur Georges te ekri a,

jafrikayiti afiche mesaj sa, jou 26 Dawou 2000 a 13:26:55:

Onè-respè,

Mwen kontan entèvansyon ou fè a Marco. Mwen rete tann pou wè si gen lòt kanmarad ki ta vle pote de gout dlo pa yo nan konbit braselide a men, mwen remake se nad marinad.

Jisteman, se atitid mwen pat mete tèt mwen deyò sa a ki lakòz jounen jodi a, se petisyon ki sèl mòd kominikasyon zagribay k ap rele tèt yo entèlektyèl nan peyi a.

Mwenmenm pèsonèlman, mwen gen plis pase dezan depi m ap rele toupatou nan tout fowòm pou ankouraje parese mantal sa yo pou yo rantre nan konbit brase lide ak tout popilasyon an.

Depi sou premye mesaj rache kè mwen te li sou Haiti-on-line nan ane 1996 osnon 97 kote yo te anonse chire pit ant Manno Charlemagne epi Fanmi Lavalas mwen te koumanse ap envite mesyedam Lavalas 1990 yo pou yo pran tout mezi ki nesesè pou kanpe degringolad la.

Nan ane 197 ak 1998, sou tout emisyon lib tribin (Kiskeya, Ginen, Antilles, Vision 2000....)se tout lasent jounen nou lanse mesaj pou sa yo rele "entèlektyèl" peyi a patisipe nan braselide yo. Non! tout chita nan fè ti rankont netwaye lonbrit "Vendredi Littéraire" nan "Institut Français". Yo a gen tan pou yo rantre nan pale ak vye moun tèt mare k ap plede pale anpil nan lib tribin.

Apa rezilta a. Kounye a, bann zentèlektyèl Vendredi littéraire sa yo tounen yon bann ensiyafyan - kantite neglijab nan sosyete a.

Poukisa?

Paske lè 11 jenn Ayisyen mouri sasinen nan Kafoufèy. Yo menm se pwezi yo kontinye resite youn pou lòt. Lè plizyè santèn frè ak sè nou peri nan lanmè, yo resite plis pwezi toujou. Lè kriminèl kapitalis touye yon ban tilezanj ak Siwo Pwazon, yo kontinye resite pwezi nan Institut Français.

Kidonk, sèl lè dezoutwa leve kanpe pou di anyen, se lè yon doktè parèy yo mouri anba bal zenglendo. Lè yon manm pati politik yo mouri elatriye...


Kidonk, yon atitid "ti klan" ki rann yo ensiyifyan.

Kote entèlektyèl peyi a, lè rezilta ekzamen bakaloreya montre 80% elèv yo pa vo nivo 3 zyèm segondè. Kisa yo pwopoze kòm solisyon...plis pwezi netwaye lonbrit.


Jounen jodi a, kit se Jean-Bertrand Aristide, Gérard Pierre Charles, Marc Bazin, Pè Smarth, pè Samdi, Claude Moise, Franklin Midi, Claudette Wherley, René Préval, Leslie ak Mirlande Manigat, Bajeux, verdiex,, Wesner Emmanuel, Sabalat ak tout lòt moun ki gen yon posiblite pou yo enfliyanse klima politik peyi a, yo dwe rann yo kont jenès la pa gen okenn lòt jès ki pral fè li respekte nou apa chita dèyè nou ansanm pou nou pote solisyon pou pwoblèm nou kreye pou li yo.

Akizasyon pasi pala tout se dilatwa. Petisyon adwat agòch tout se lòbèy. Lè yon Lavalas 1990 ap ekri Aba Lavalas nan ane 2000 ou kwè gen moun ki ka pran li oserye?

Lè mwen tande dènye chante Frères Parents sòti ane sa a, mwen di nan tèt mwen apa nèg yo pa konprann anyen nan anyen osijè wòl yo nan peyi a.

Kifè n ap fè tout vi nou ap fè OPOZISYON kont pwòp tèt nou.

Depi nou kòmanse pèdi de mab, krase won, chanje patnè, rele aba.

Mesyedam, sispann aji tankou timoun.

Sispann mande Prezidan Préval "mete kle palè anba pòt la" pou nou vin fè yon kou. Ayiti pa yon "lafrèchè" pou chak sanzave vin fè "yon kou". Se youn peyi ki gen 8 milyon eritye ak papye legal. Kidonk, sispann ranse ak lavni moun.


Manigat kot pwogram politik ou?
Gérard Pierre Charles kote pa ou?
Bazin, ou la toujou?
Aristide, ki plan ou pou chire pit la fini ant oumenm ak ansyen kanmarad ou yo?

Istoryen Claude Moise, kisa ou pwopoze pou jenn Ayisyen manyè aprann istwa peyi yo kòmsadwa, olye yo kontinye ap repete radòt ewosantrik Frères de (la destruction) Chrétienne yo.

Sosyològ Laennec Hurbon, kisa ou wè nou bezwen pou rezoud pwoblèm restavèk la atoujamè.

Mwenmenm mwen bezwen pote kontribisyon pa mwen nan konbit la. Pòl, Jinèt ak Wilnè pare tou...men omwens fòk noumenm ki gen enfliyans yo sispann grennen tenten.

Tanpri mesyedam, pa di mwen tout repons yo nan dènye liv nou te ekri a, nan dènye rekèy powèm nou te pibliye a, nan dènye "Vendredi Littéraire" nou te reyalize a.

Se pa aksyon endividyèl sa yo ki enteresem.

Sa mwen mande se kisa nou pote pou konbit la vanse?

Mèsi pou lekti a. Si nou pa reponn, mwen konnen...menm penpenp la ap kontinye...

Jafrikayiti



Repons sou sijè sa: