Petisyon 193 "Sitwayen" yo

[ Kesyon Moun Mande Anpil ]

An repons a: Petisyon 193 "Sitwayen" yo Marc-Arthur Georges te ekri a,

jafrikayiti afiche mesaj sa, jou 29 Dawou 2000 a 21:29:08:

Onè Marco,

Monchè annou kontinye braselide a. Zòt ki vle va kontinye fè espektatè silansye osnon yo va rantre san jennman nan konbit braselide a.

Nan yon dividal pawòl konsekan ou mete atè nan dènye mesaj ou a, ou ekri: « Leta dwe
òganise yon sòt de patenaria aktif e pèmanan avèk tout moun ki vle kontribiye a rann lavi sitoyen pi si nan peyi Dayiti.Fò
dirijan nou yo met nan tèt yo ke yon nasyon se pa yon bagay politik ou imaginè, se yon realite sosial. Fò yo kreye yon èspas
politik ki gen lwa kisoti nan diskisyon ak tout moun, ke tout moun ap respekte e se ak lwa sa yo nap arive kraze desakó ak
konfli. »

Sa se kichòy ki atire atansyon mwen anpil. Paske, se menm jounen jodi a mwen kòmanse li "livre blanc" Fanmi Lavalas pibliye nan finisman ane 1999 la.

Lè mwen koumanse fè lekti a, mwen santi pou premye fwa nan lavi mwen, genlè gen yon gwoup moun ki eseye pran tan fè vizyon yon leta ki kanpe jan ou defini li pi wo a. Daprè 50 premye paj mwen li yo, epi askanp chapant li, pwogram "Livre Blanc" an prezante analiz epi pwojeksyon ki kanpe sou baz chif ak estatistik, men anmenm tan yon konpreyansyon reyalite sosyopolitik peyi a ki parèt klè, epi byen chita sou baz listwa ak reyalite aktyèl la tout konposant sosyete Ayisyen an.

An patikilye, daprè lekti mwen fè jiskaprezan, sanble Livre Blanc an rekonèt menmjan ak ou «nasyon se pa yon bagay politik ou imaginè, se yon realite sosial».

Antouka. Mwen ta renmen wè kouman lòt moun resevwa apwòch, lide, chif, pwojeksyon, plan ki layite andedan "Livre blanc" an.

Li klè, lefèt ke liv enpòtan sa a, poko (pap?) disponib nan lang Kreyòl, rann braselide a pi lou. Paske gen tradiksyon ak entèpretasyon ki vin nesesè. Men, mwen kwè nou debat kesyon sa a deja.


Èske gen lòt lidè politik osnon «entèlektyèl» Ayisyen, tankou sila yo ki siyen petisyon yo, ki deja fè analiz osnon reyaksyon sou "Livre Blanc" an?

Antouka mwenmenm mwen ta renmen wè yon bèl braselide sou chak chapit ki nan liv sa a. Si moun ki manm Fanmi Lavalas yo menm ta vle rantre nan braselide "demokratik" sa a, li ta yon prèv, koze enteresan ki nan liv la, se pa bèl pwezi, se "twa pawòl".

M ap tann reyaksyon pa ou, ou menm ki fenk fin li mesaj sa a...


Jafrikayiti




Repons sou sijè sa: