An repons a: Malgre rasis antisemit Pi IX, pap la beatifye misye kanmenm! Guy S. Antoine te ekri a,
jafrikayiti afiche mesaj sa, jou 06 Septanm 2000 a 18:35:28:
Rete ! Guy, apa ou tounen yon sen -tentèwonp. Kifè ou pa dakò pou nou kontinye adore blan - pitit prefere «bondye» yo?Roody genlè espantan dèske gwo blan Vatikan yo nonmen yon gwo papa rasis devan letènèl "Sen Pi". Men, mwenmenm sa ki fè mwen espantan se lè mwen li Jan XXIII te yon "bon" "pap". Kòmkwa, nèj ta tonbe nan lanfè?
Gen yon liv ki rele "In the name of God" kote otè a, David Yallop, deplòtonnen tout mannigans mafyozo Vatikanik ki alorijin sansinay Pap Jan Pòl I. Ak lekti ti liv sa a, yon moun kapab konprann aklè ki kalite "sen" zenglen ki alatèt relijyon Krisyànis la. Mwen ankouraje moun k ap suiv pwosesis lanmò relijyon Krisyanis la, pou yo fè yon ti lekti nan "In the name of God".
Mwen pa regrèt ditou dèske Nichol kwesedyo ke zòt rele Papa yo, Jan Pòl II, twò kontan "beyatifye" kanmarad li Pi IX. Sa kapab ede kèk moun ki rantre fon nan twou evanjeliza-zonbifikasyon an, pou yo koumanse bouske chimen sèl. Sa ki t ap fè mwen panike, se si yo te entèlijan ase pou yo te kouri beyatifye ti tyoul blan (Tonton TOM) yo bay pou "Pierre Toussaint" an.
Daprèzavwa se noumenm nèg ak lòt pèp y ap evanjeliza-zonbifye depi 1492 ki kenbe relijyon rasis sa a vivan toujou (yo pa fouti jwenn blan ki byen nan tèt yo - pou al fè pè selibatè !), si yo koumanse beyatifye tout kalite "Affirmative Action Saints" tankou Pierre Toussaint, Aunt Jemima, Uncle Tom elatriye... n ap pran nan gonm pou plis tan toujou. Paske pral gen plis nèg ki pral di: ou wè kijan legliz la inivèsèl...Le passé c'est du passé - toutes choses sont devenues nouvelles! La fraternité humaine epatati e-rablabla.
Okontrè, apre Pi IX, mwen ta kontan anpil si yo ta tou deside beyatifye Hitler ak Rochambeau. Men, malerezman malgresa, mwen sispèk gen kèk nèg k ap kontinye adore blan nan plas Bondye.
Antouka, noumenm nèg ki kase chenn annou sèmante pou nou pa janm bouke manje epi pataje sèl ak frè/sè nou ki tounen evanjeliza-zonbi. Nou pa andwa bliye kijan sa te rèd pou noumenm tou lè, tou lòtrejou la a, nou te antòtye nan chenn toujou !