An repons a: Fanmi Lavalas - Lopozisyon - Liv Blan - Kle anba pòt JONAS te ekri a,
jafrikayiti afiche mesaj sa, jou 26 Septanm 2000 a 18:08:46:
Ayibobo!Pawòl ou konsekan Jonas. Mèsi pou bon jan analiz louvri je sa a ou pataje ak nou.
Mwen dakò ak ou 100%
Depi 1991 se laboratwa a k ap make gwp pwen. Divizyon fè kenken. Souvan mwen sèten, se pa ideyoloji ki alabaz, se vye enterè pèsonèl. Li lè pou sa sispann.
Remake tou kijan zak sansinay yo estratejik. Anpil nan Mapou ki tonbe yo se ak peyizan yo t ap travay. Se pa nèg ki te estannbay Pòtoprens ap pale anpil. Se nèg tankou Pè Jean, Jean-Marie Vincent, Jean-Do epi kounye a yo atak Fonkoze ak makiyaj Lapolis (pou chay la tonbe sou gouvènman an? pou plis chirepit fratrisid?).
Mwenmenm, mwen pa gen gwo eksperyans nan politik men, men kwè laboratwa apa chanje taktik souvan. Fòmil yo aplike Nikaragwa, se li yo aplike Sansalvadè, Ayiti, Lagrenad.
Kidonk, Mesyedam Lavalas yo kontinye goumen, n a wè ki lantèman k ap chante lè li katrè.
Mwen pa kwè pèp Ayisyen merite sa. Nou goumen twòp pou lajistis. Kounye a, se wòl lidè yo pou yo jwenn chimn lapè ak laviktwa sou "zanmi" nou yo.
Mèsi anpil pou inisyativ ou a epi pataj eksperyans ak konesans ou. M ap tann entèvansyon lòt kanmarad ki pa pè itilize libète lapawòl nou genyen an, pou byennèt kolektivite a. Lèzòt yo mèt rete ap fè politik gran save ( twòp pou lapopilas) nan salon lakay yo.
OEA, USAID ak lòt kolon yo va kontinye analize epi pwopoze pou yo.
Respè,
Jafrikayiti