Emmanuel VEDRINE afiche mesaj sa, jou 07 Oktòb 2000 a 14:36:58:
"Kisa n ka fè pou ede Ministè Edikasyon Nasyonal Ayiti?"Bon, se yon kesyon anpil nan nou ka bay kèk repons patikilye pou li. Men kite m di w yon ti bagay: toutan nou menm Ayisyen pa deside travay pou Ayiti toutbon ak nanm / fòs / resous / bòn volonte nou enben jenerasyon lan 2000 lan ap toujou gen yon sèl lide nan tèt li: "Kite Ayiti". Donk, nan sans sa a youn nan bagay edikatè ayisyen nan dyaspora a ka panse met aksan sou li, se ta: "Estrateji pou kolabore ak Ministè Edikasyon Nasyonal Ayitil / bonjan edikatè ayisyen (Ayiti & nan dyaspora a)" pou wè kisa n fè (patikilyèman nou menm ki gen ti resous ak lakonesans). Nou kapab etale pwopozisyon sa yo konsa:
1. Kreye yon pajwèb (sit) oubyen yon lyenajwèb (koneksyon pajwèb) pou mete tout dokiman nou panse lekòl Ayiti ta bezwen ladan.
2. Mete yon lis pajwèb ki gen dokiman sou Ayiti ladan oubyen jis ogmante sou anyè elektwonik mwen kreye deja ("The Haiti Superweb Directory", http://www.tanbou.com/1199Resources.htm) pou fasilite rechèch sou Ayiti.
3. Mennen yon kanpay pou ranmase papye rechèch / dokiman rechèch (ki an rapò ak Ayiti, elèv / chèrchè k ap ekri sou Ayiti e dokiman rechèch an jeneral pou bay elèv ak anseyan Ayiti (nan tout nivo) aksè a rechèch pou ede yo).
4. Pou reyalize sa, se yon bagay fasil (osilontan ou kwè nan ide sa yo e ke ou ta renmen ede Ayiti elanse nan domèn Edikasyon ak Rechèch san tann se kwi pou n al lonje devan zòt pou reyalize yon seri ti pwojè fasil (nou menm nou ka fè) pou byennèt peyi nou. Nan sans sa a, koze "teknoloji" a nou pa ka kite l dèyè. Anpil Ayisyen ta grate tèt yo lè n mansyone ‘teknoloji'. Kite m di w: Ayiti se youn nan peyi nan lemonn ki kale "sèvo" men pwoblèm nou sèke nou pa kwè nan "potansyalite" nou oubyen pran ti tan reflechi sou kijan pou n aprann itilize pwòp resous nou. Se yon konbit konsyantizasyon kote n bezwen tout moun , tout pwofesyonèl (Ayisyen kou blan), non sèlman pou ban nou koutmwen men tou pou boukante lide, lide k rele lide pou devlope Ayiti. Donk, panse a kijan ou ka konsyantize edikatè ak espesyalis ayisyen (nan tout domèn pou aprann mete konesans yo o sèvis Ayiti) ak tout lòt moun ki ta vle ede nou.
Youn nan nannan koze a tou ta "kreyasyon yon bonjan sant rechèch Ayiti" (kote premyèman fòk gen konpitè pou kreye yon sistèm enfòmatize pou dokimante ep enprime materyèl sa yo). Sa ta pèmèt nou fè yon seri atelye ak monitè / anseyan / elèv dekwa pou bay pi bon rannman lekòl (nan kad devlopman ak estrateji pou itilize materyèl didaktik). Ann pa pale anpil, fè yon dal literati ak sa, men wè ki ide ou menm ki sousye de devlopman Ayiti ka bay, kisa ou ka pwodui pou Ayiti benefisye de li (nan yon lap de tan), ou menm ki gen tout kalte digri k pandye nan panno lakay ou: kòman Ayiti ka benefisye de yo? Panse a konkretizasyon ide sa yo.
Pou rejwenn prestij nou nan listwa e pou chanje imaj negatif Ayiti, sa depann de mwen /de ou/ de nou tout e jodi a se youn nan defi k kanpe an kwa nan wout pwogrè peyi nou pou n leve. Edikasyon se youn nan pòt lakay n ap bezwen chanje seri l pou kle siksè travay ladan. M swete ou va panse a ide sa yo epi pataje yo ak zanmi ou pou vin bay konkou nan gwo konbit sa a.
Patriyotikman,E. W. Védrine,
http://hometown.aol.com/mit2haiti/Dizan.htm
http://hometown.aol.com/mit2usa/Vedrine-MIT2.htm)