An repons a: Kay pou Elina Dorisca D'Haiti jafrikayiti te ekri a,
Guy S. Antoine afiche mesaj sa, jou 15 Oktòb 2000 a 21:04:09:
Jafrikayiti,
Osito mwen konnen adrès la, mwen va pibliye li pou nou. Si ou resevwa li anvan mwen, fè demèm.
Se yon bèl travay tout bon, Bayyinah ap fè avèk Fondasyon Santnè Ayisyen yo. Travay sa tèlman enteresan, mwen te pase senkèdtan ap diskite li ak Bayyinah yon jou pandan ete a, lò dènye pasaj Ginen sa nan Nou Yòk.
Konsa nou te pale anpil de Msye Kanis Ogis, youn nan Onorab Santnè Ayisyen yo "Fondasyon MCHFBD" Bayyinah kreye a te pran chaj pou l sipòte. Lò mwen li "liv memwa Kanis" Bayyinah te pibliye a, "MWEN RELE KANIS OGIS. MWEN GEN 123 LANE.", mwen santi se te kòmsi mwen te konnen Kanis tou. Bayyinah te fè mil ekzanplè liv sa, li vann tout. Tout liv la se pawòl Kanis. Bayyinah te anrejistre yo sou tep epi li akouche yo sou papye. Men se pawòl grandèt la nèt ale.
Lò mwen mande Bayyinah nouvèl li, li di mwen malerezman msye te mouri nan mwa Mas la. Batistè Kanis la endike l te fèt premye janvye 1876 nan Benè (li di l fèt Kalabe) andeyò vil Tigwav. Msye Kanis Ogis mouri a 124 an, twa mwa, trèz jou. Pou dènye anivèsè li, msye te refize gato, men li te aksepte yon koup Chanpay. Mwen wè foto msye ak kour Chanpay li jou 124 lane li a. Avan li mouri, li te voye chache Bayyinah pou li koze avèk li. Li te anonse li nan de jou ankò li t ap anba tè. Bayyinah pa t vle kwè, li di msye li te fèt trouve yon madanm pou li, kisa l ap di konsa, men msye te konnen ki sa li t ap di, pase li mouri nan demen. Men avan li mouri li te trouve sa nesesè pou li bay Bayyinah de mesaj enpòtan:
1) Lapriyè anpil anpil anpil pou Ayiti, pase peyi a bezwen sa.
2) Kontinye travay l ap fè ak Fondasyon Santnè yo sere sere, paske si yon peyi pa kapab okipe zafè pi gran li yo (yon ti gwoup moun tou piti), kouman l a fè pou l okipe zafè tout pitit li yo?
Pawòl sa konsekan anpil. Se pawòl defen Kanis Ogis ki pase alaksyon lò Bayyinah antreprann demach sa pou li ede bati yon ti kay pou yon lòt Santnè... lò li kontinye ap travèse tout longè peyi a pou li dekouvri lòt Santnè toujou. Travay sa fèt kòmanse. Petèt yon jou nou va dekouvri se nan betiz y ap pase nou lò yo di vi esperans vi yon sitwayen Ayisyen se 45 an li ye (san yo pa ajoute okenn kalifikatif, epi yo renmen resite menm vye pawòl yo tout tan, san yo pa janm fè okenn verifikasyon).
Pou mwen fini mwen ta vle site dènye paragraf liv Bayyinah Bello a:
"Jou nou t ap ap al renmèt tèks sa bay fabrikan liv la, tout santnè ayisyen sa yo se moun ki t ap regle zafè yo nòmal, moun ki ka kenbe yon konvèsasyon òdinè ak bonsans epi, anpil nan yo toujou ap travay pou pote kontribisyon yo nan aktivite sosyete nou an. Tant Germaine fenk tounen sòti nan yon vwayaj an Afrik, Lunie Vilaire toujou renmen deklame pwezi papa l Etzer Vilaire, Pè Isaac, Rip Louijean, Aristodème Gustin kontinye ap travay latè..."
Onon Grandèt yo, mèsi.
Repons sou sijè sa: