Michel-Ange Hyppolite afiche mesaj sa, jou 31 Oktòb 2000 a 22:51:54:
Jodi a ankò mwen deside kontinye ak lèt mwen yo. Dènye fwa a se sèl Frantz Benjamen ki te bay apresyasyon li sou tèks mwen ta kab rele lotòn lan. Lèt jodi a pa pe pran youn demach pwetik menm jan ak dènye a. Se pito youn refleksyon jenneral sou youn angajman kominotè.
Pa ezite kòmante sou li, Di mwen sa nou renmen ladan. Sa ki ta merite chanje. Konsa nou va louvri youn eksperyans lekriti ansanm nan lakou REKA.
Michel-AngePawòl Ife ak Soul
Bonjou Soul !
Semenn sa a se dezyèm semenn depi chalè vwa ou pa kannale nan liy telefòn lan pou li vin tanpe konsèy ou nan tande mwen, tankou sa te konn abitye fèt pandan tout mwa pase yo. Mwen konnen ou okipe jouk nan kou, men lè abitid fin tabli baz , li difisil pou mwen pa santi vid ki anvayi moman espesyal sa yo. Kout van tanperaman ou toujou ban mwen laperèz, men kèlkeswa sa ou tande a nich li kontinye grandi nan koki zòrèy mwen.
Soul, mwen pa konnen si ou remake sa, sè tansi pasyans mwen pèdi pasyans. Mwen pale ak raj. Anpil fwa sanzatann gen mo fewòs ki pwofite pandan mwen eta despri sa a pou yo pran woulib sou kouran mesaj mwen yo. Se kòmsi langay mwen rantre anndan youn rechany Gede. -- Pandan mwen ap palede Gede a gen yoùn nan fraz razwa ou yo ki flache nan lespri mwen. Ban mwen fè ou koute li: « Dènye fwa mwen te gade a, mwen wè mwen fanm toujou». Tande non, se ak youn glas ou te fè koudèy la oubyen se an dyesèl ou te parèt pou ou te fè tyèk sa a? Antouka, pito mwen mache pòs mwen pou pawòl razwa ou pa koupe -m. Bon! Mwen fin deraye nèt atò. Wi Soul annou rekòmanse. Ou pa bezwen di «fik him». --
Mwen vin enpasyan. Tolerans mwen kapote. Ou tèlman santi sa, se tanzantan ou raple-m kèk metòd ajisman pozitif tankou: korije tout sa ou santi ki dwe korije san ou pa blame pèsonn. Pale anpil pa donnen chanjman. Se petèt fason pa ou pou ou rantre mwen anba tretman anvan mwen kase kòd ki makònen mwen ak kominote « Jersey City» a. Antouka, si ou remake langay mwen ap charye youn gou piman bouk, se pa tanperaman ou non ki detenn sou mwen. Se senpman paske mwen gen lontan mwen ap mete enèji pou mwen chanje figi kominote a, epi tout efò mwen yo koule kou dlo ki pase nan panyen pou yo al konble «Hudson River». Si mwen ta pe viv ansanm avèk ou nan Outawè, mwen ta petèt pote panyen mwen nan Larivyè Rido.Soul, nou gen youn bout tan depi pawòl nou monte bwa. Sepandan, mwen pa janm kite youn okazyon pase san mwen pa reflechi sou divès kalite erè nou fè, swa kòm endividi swa kòm kominote . Men se pwòp erè nou ki dwe tounen sous aprantisay nou. Sepandan si nou kontinye ap fè menm erè yo, nou dwe kòmanse poze tèt nou kesyon sou ajisman nou. Mwen konnen ou ap di nan kè ou : «sa ki nou an? Pale pou tèt ou». Men ou konnen aklè nou an se mwen avèk ou nan divès faz nan lavi nou.
Chak evennman , pozitif kou negatif, pote youn leson pou mounn ki pase anba li a ansanm ak pou tout lòt mounn ki pataje menm anviwonnman ak li . Paske, se nan pale younn ak lòt nou ap rive agrandi chay eksperyans pèsonèl nou. Se kalite echanj sa yo tou ki pral ban nou ladrès pou nou kontinye goumen san nou pa bay gany. Se poutètsa, jodi a mwen vle ou konnen konsèy ou pa rantre nan telefòn lan pou granmesi. Mwen ap kontinye goumen nan tout fason mwen kapab pou mwen rale chanjman pozitif yo, epi sèvi avèk yo youn fason pou yo ranfòse aksyon mwen nan divès nivo fonksyonnman mwen. Konsa, chak erè dwe tounen youn degre konviksyon anplis pou mwen chanje apwòch ki pa fonksyone yo epi ranplase yo ak lòt kalite estrateji.
Ou wè sa hen! Afòs nou fè lide nou palmante younn ak lòt, mwen kòmanse aprann pale menm langay avèk ou. Estrateji. Gen mounn ki va konprann ou fin detenn sou mwen, men sa yo pa konnen an, sèke chak fwa mwen pran laye chay mekontantman mwen sou zèpòl ou , se toujou menm pawòl la ki vin jwenn mwen: chanje estrateji.. Ou pa janm bouke di mwen: bon rezilta yo se pa nan mache prese mwen pral jwenn yo. Se depreferans aksyon mwen ki pou trennen yo. Poudayè, se abitid mache prese sa a menm ki lakòz ou ban mwen youn ti non jwèt ki chaje ak siyfikasyon.Ou gen rezon, mwen aji ak rapidite. Men se pa nan tout sikonstans rapidite pote siksè. Si mwen raple ou abitid rapid la konn lakòz mwen kite swaf ou nan wout. Mwen pa kwè mwen ap aprann ou anyen ki nèf. Mwen senpman ap reveye lechakidò, pa vre? Mwen deja konnen ki fraz ki ap pase nan tèt ou: Rete nan sijè a.
Mwen konn sa. Ou pa renmen lè flanm pawòl mwen chankre tout boulin sou pant ou santi ki make dezagreman an, sitou lè ou konnen mwen ap jwe ak di. Men avèk ou, pa gen anpil lòt fason pou mwen pataje sa ki ap pase anndan mwen.Espesyalman lè mwen sonje nan ki fason, sanzantann, nannanje mwen konn pèdi ekilib pou li al tonbe sou pwent juisans ou ki poze nan lizyè chemen biskèt ou pou yo fè mwen filalanng.
Pandan mwen ap bay kè mwen fil mòl pou li reklame dwa lapawòl li, mwen santi souf ou, drèt sou zèpòl gòch mwen,ki ap devye panse mwen. Epi se fraz sa a menm ki parèt nan lide mwen: «L’homme devient meilleur après avoir mangé». Kòm pa vrèman gen youn fenomèn ki rele aza, dwe gen youn rezon pou sa. Pou di ou sonje ki mounn ki te konn repete fraz sa a?Ou vle konn youn bagay, Soul? Tèt ou wè la a, se pa ni yoùn ni de ni twa pouvwa li genyen, men yo tout ansanm mache anba youn sèl domèn: Limajinasyon.
Tande non! Lè mwen te kòmanse ekri lèt sa a mwen pa te panse nou ta pral pase tout sa a ansanm non, m’ale! Nou va kontinye konvèsasyon an youn lòt jou nan telefòn lan. Mèsi pou tout konsèy ou yo. Mwen fenk kare sèvi avèk yo.
Gwo Bo!
Ife