Referandòm + Eleksyon 26 novanm 2000

[ Kesyon Moun Mande Anpil ]

An repons a: Referandòm + Eleksyon 26 novanm 2000 jafrikayiti te ekri a,

Gerard Previl afiche mesaj sa, jou 04 Novanm 2000 a 03:05:35:

Kanmarad Jafrika,

Nan ti bwase-lide n ap fè yo, lè nou di "Pèp" nou p ap pale selman pou tout jepeteklere, roch nan solèy, pitit sò Yète ak konpè Tidjo k ap pran lakominyon san konfese nan men monpè ki fè yo tounen tòchon pou fè lijyèn pèsonèl yo; pandansetan yo menm (ti pèp la) ap monte lesyèl pa do.

Lè nou di Pèp nou menm, nou vle pale "nasyon ayisyenn nan". Sa vledi ni klas politik ki pa gen matirite w ap kritike a, ansanm ak klas reaksyonè w ap kodane a, pase pran lot gwoup moun nou t ap pale anvan yo; tout kategori moun sa yo mele ansanm fè pati Pèp nou vle pale a. Pou pi klè nou vle di tout ayisyen anjeneral.

Kidonk, menmsi laparans ta fè nou wè bagay yo youn jan; men nan reyalite depi peyi a ap soufri tout pitit li yo nòmalman gen doulè tou. Nan sans sa nou pa k konprann ou menm lè w ap di Pèp la pa k rete tann; komkwadire se ta va youn sèl gwoup moun sitiyasyon peyi a konsene. Podyab pèp la depi kilè zòt te sansib pou ou konsa!

Li lè pou nou sispann mete chay mizè peyi a sou do youn gwoup moun; sispann akize sispann kondane bagay sa yo toujou pi fasil pou fè. Li lè li tan tou pou nou komanse reflechi sou sitiyasyonn peyi a nan youn lòt nivo.

Kenbe la kanmarad.




Repons sou sijè sa: