Prigad ak dokiman sou entènèt la

[ Kesyon Moun Mande Anpil ]

Emmanuel Vedrine afiche mesaj sa, jou 14 Novanm 2000 a 01:38:30:

Prigad ak dokiman sou entènèt la

M voye ti mesaj sa a bay tout moun k ap pibliye rechèch (elektwonik / liv). Sèjousi, nou konnen entènèt la se youn nan meyè sous pou moun gen aksè a rechèch e pou moun k ap fè rechèch nan tout sans men nan tout bagay, DISIPLIN se yon koze enpòtan. Mwen kòmanse remake kèk ti pwoblèm nan piblikasyon yon konpatriyòt (mete deyò pa tèlman lontan) kote l ta pran kèk enfòmasyon sou entènèt la (ki pase alafwa nan lis diskisyon / fowòm REKA) epi l pa site atik la / otè atik la obyen bay "referans dirèk".

Menmsi n ta site kèk pajwèb nan rechèch nou pibliye (liv / piblikasyon elektwonik), li enpòtan pou n ta site òganizasyon ki mèt pajwèb sa yo tou (pase yo anrejistre sou non yon òganizasyon kèlkonk). Nan kouri pran koze sou entènèt la (san ‘referans dirèk' pou n al di nou pibliye) se nan pwoblèm legal nou ka met tèt nou trapde. M pa p site non pesonn / tit okenn piblikasyon men moun k ap kouri pibliye va reflechi sèt fwa.

Zafè piblikasyon an ka mangonnen (lè otè a anrejistre tout zèv li atravè yon seri kòd ke nou pa konnen pou pwoteje dwadotè l.). Se yon bagay senp (pou n pa tonbe nan tyouboum): site tit zèv la / non otè a /dat piblikasyon an / kote l pibliye (apre yon sitasyon oubyen mete yon nimewo ("footnote") anba pati ou pran an epi nan fen dokiman ou pwodui a, mete "nòt #1, #2, #3, elt.

Lè n pa bay referans lan (jan n dwe fè sa), non sèlman y ap konsidere n kòm vòlè men lè piblikasyon sa a tonbe anba men pwofesyonèl, yo pa p pran nou oserye ni zèv nou pwodui a (li te mè t yon atik n ap ekri) pouvike gen absans referans nan travay la. E pa tèlman lontan, youn nan gran inivèsite eta "Massachusetts" anile tèz doktora yon etidyan prezante deja, kote msye pran yon pati nan travay yon moun epi l pa bay referans. Donk se pa yon koze ki gen jwèt ladan; panse a pousuit legal.

M pa gen pwoblèm pou m bay ti limyè sou sa (fason rechèch dwe fèt) pou ede konpatriyòt ayisyen k ap fè ti efò soti yon zèv e menmsi ou ap pwodui yon zèv fiktif, si w ta pran kèk koze ki pa pou ou, ou dwe site sous la e pa gen tèlman lontan de sa, yon otè / chèrchè alman (kèk nan nou ka tande pale de li) ap trennen youn nan gwo ekriven latino lajistis (asavwa nan dènye woman msye genlè l ta bwè ti dlo nan yon sous li kache).

"Piblikasyon elektwonik" yo vin pi danjre (pase nou pa konnen ekzatteman entansyon otè yo, sitou si yo se ekriven / chèrchè pwofesyonèl; lefèt yo lage yon dokiman sou entènèt la pa vle di pou otan yo pa konnen sa moun ka fè ak yo oubyen yo ta enbesil). Mwen pran opòtinite sa a tou pou m di m ap denonse karebare e tradui lajisjis nenpòt moun ki ta mal itilize piblikasyon m mete sou entènèt la, nan kèlkeswa pajwèb / lis diskisyon yo pase. Donk panse e repanse, pa jis kouri pran koze sou entènèt la pou n al di nou pibliye sesi sela. Tout dokiman yo anrejistre.

Lagè avèti pa touye kokobe.

E. W. Védrine

Repons sou sijè sa: